Raforkuvinnsla og sala Landsvirkjunar á árinu 2013 gekk vel. Selt magn nam 13.186 GWst á árinu sem er mesta raforkusala í sögu félagsins. Á árinu var að mestu lokið við byggingu Búðarhálsvirkjunar sem skilar félaginu aukinni framleiðslugetu frá mars 2014.

Góð afkoma grunnrekstrar

Árið 2013 hækkuðu tekjur frá fyrra ári vegna aukinnar raforkusölu og hækkandi flutningstekna en á móti kom að álverð á heimsmarkaði fór lækkandi á árinu. Afkoma grunnrekstrar, hagnaður fyrir óinnleysta fjármagnsliði, hefur farið hækkandi síðustu ár og var 2013 besta afkomuár í sögu fyrirtækisins. Þrátt fyrir þetta var tap á rekstri fyrirtækisins eftir skatta. Tapið skýrist af lækkun álverðs á heimsmarkaði sem kemur meðal annars fram í mikilli lækkun á bókfærðu verði innbyggðra afleiða sem fyrirtækið getur haft takmörkuð áhrif á.

Handbært fé frá rekstri nam 258 milljónum USD sem er það næst hæsta í sögu samstæðunnar. Fjárfestingar hækkuðu frá fyrra ári en sökum góðs sjóðstreymis var mögulegt að halda áfram að greiða niður skuldir og styrkja fjárhagsstöðu fyrirtækisins.

Landsvirkjun hefur á undanförnum árum markvisst unnið að því að draga úr áhættu. Helstu fjárhagslegu áhættuþættir eru álverð, vextir og gengi gjaldmiðla gagnvart Bandaríkjadal.

Horfur í rekstri

Landsvirkjun mun áfram leggja áherslu á niðurgreiðslu skulda ásamt því að auka hagræði og draga almennt úr áhættu í rekstri fyrirtækisins. Afkoma Landsvirkjunar mun áfram ráðast að miklu leyti af þróun álverðs, vaxta og gjaldmiðla. Tekjur fyrirtækisins eru að hluta til tengdar verði á áli og breytingar á álverði á heimsmörkuðum hafa því áfram áhrif á framtíðartekjur Landsvirkjunar. Álverð er um þessar mundir lágt og mikil óvissa um þróun þess á næstu misserum. Meirihluti lána fyrirtækisins ber breytilega vexti og því er áframhaldandi lágt vaxtastig mikilvægt rekstrinum.

Síðasta vatnsár (sem er frá 1. október til 30. september hvers árs) var slakt vegna úrkomuleysis og kulda á hálendinu sem olli því að ekki náðist að fylla öll miðlunarlón Landsvirkjunar síðasta haust. Það sem af er yfirstandandi vatnsári hefur innrennsli í lónin verið talsvert undir meðallagi. Vegna þessa hefur Landsvirkjun þurft að tilkynna um skerðingu á afgangsorku. Áformaðar skerðingar eru í fullu samræmi við gildandi raforkusamninga og gert ráð fyrir að þær geti orðið allt að 2% af áætlaðri raforkusölu Landsvirkjunar á árinu 2014. Ef leysingar hefjast getur staðan breyst hratt til batnaðar og skerðingum verður þá aflétt.

Búðarhálsvirkjun var formlega gangsett og tekin í fullan rekstur í mars 2014. Næstu virkjanaverkefni Landsvirkjunar sem áætlað er að komi til framkvæmda verða á Norðausturlandi, en framvinda þeirra er háð orkusölusamningum við raforkukaupendur og viðeigandi heimildum.