Framkvæmdir við Sporðöldustíflu hófust sumarið 2011 með gerð hjáveitu fyrir Köldukvísl og hreinsun og greftri úr stíflubotni. Sumarið 2012 hófst stíflufylling sem lauk nú í haust. Fylling í Sporðöldulón hófst í nóvember og var lokið á þremur vikum.

Véla- og rafbúnaður stöðvarinnar er frá þýska fyrirtækinu Voith. Framleiðsla á búnaði fór fram víða um heim, m.a. í Svíþjóð, Brasilíu, Kína, Króatíu, á Ítalíu og Spáni. Uppsetning á búnaði hófst í lok árs 2011 og á árinu 2012 var lokið við uppsetningu og innsteypingu á sográsum og sniglum. Mikill og góður gangur var í uppsetningu véla og tilheyrandi búnaðar á árinu og í byrjun október var uppsetningu lokið og prófanir hafnar. Vél 1 framleiddi rafmagn í fyrsta skipti inn á flutningskerfi Landsnets þann 16. desember en eiginleg framleiðsla að loknum prófunum á vélinni hófst 11. janúar 2014. Vél 2 hóf framleiðslu að loknum prófunum 8. febrúar 2014.

Í nærri öllum stöðvum Landsvirkjunar eru notaðir Francis-hverflar. Í Búðarhálsstöð og Steingrímsstöð í Soginu eru hins vegar notaðir Kaplan-hverflar. Kaplan-hverflar eru notaðir við lága fallhæð með miklu vatnsstreymi. Vatnshjól Kaplan-hverfla líkjast skipsskrúfu og hægt er að breyta skurði blaðanna til þess að stýra afli og nýtni hverfilsins.

Lokur og lokubúnaður eru frá franska fyrirtækinu Alstom Hydro en framleiðsla fór að mestu fram hjá undirverktaka þeirra, fyrirtækinu Pemel frá Portúgal. Framleiðsla á lokum hófst um mitt ár 2012 og samhliða uppbyggingu mannvirkja var unnið að uppsetningu á lokubrautum og tilheyrandi búnaði á verkstað. Sográsarlokurnar voru teknar í notkun í ágúst síðastliðnum þegar vatni var hleypt að stöðinni frá Sultartangalóni. Uppsetningu á lokum og lokubúnaði lauk með frágangi á hjólalokum í inntaki stöðvarinnar í nóvember 2013.

Þrýstivatnspípur stöðvarinnar eru íslensk hönnun og framleiðsla en yfirleitt hafa þrýstivatnspípur í stöðvum Landsvirkjunar verið framleiddar erlendis. Framleiðsla á pípueiningum hófst í Garðabæ í ársbyrjun 2012 hjá Teknís, undirverktaka Íslenskra aðalverktaka, og voru fyrstu einingarnar fluttar á verkstað í maí sama ár. Uppsetningin gekk vel og lauk í byrjun árs 2013 en sandblæstri og málun var lokið í júlí.

Á árinu 2013 störfuðu að jafnaði tæplega 300 manns á verkstað við byggingu Búðarhálsvirkjunar, langflestir eða rúmlega 200 á vegum byggingaverktaka. Í lok árs var búið að vinna um 900 ársverk við Búðarhálsverkefnið. Hér eru ekki meðtaldir aðilar sem unnu að framleiðslu á véla- og rafbúnaði fyrir stöðina víða um heim.

Þrýstivatnspípur stöðvarinnar eru íslensk hönnun og framleiðsla.

Öryggismál voru forgangsverkefni við byggingu Búðarhálsvirkjunar og allar mögulegar ráðstafanir gerðar til að koma í veg fyrir slys. Árangurinn hefur verið góður og hvatning til allra sem að verkefninu komu að halda þeirri miklu og góðu öryggisvitund áfram.

Að undanskildum frágangi vinnusvæða og síðustu prófunum véla lauk byggingu Búðarhálsvirkjunar á árinu 2013. Stöðin var komin í fullan rekstur í mars 2014. Gert er ráð fyrir að vinnubúðir og verkbú verktaka verði flutt af svæðinu á næstu misserum. Næsta sumar verður unnið að frágangi og landmótun umhverfis helstu mannvirki stöðvarinnar.